Nagkasugot ang Saudi Arabian football team nga Al Hilal kag Brazillian football superstar Neymar nga i-terminate na ang kontrata sa tunga sang duha.
Ini ang kasunod sang asud-asod nga injury ni Neymar sa sulod sang 18 ka bulan nga pagpabilin niya sa nasambit nga team.
Sa isa ka statement, ginpasalamatan man sang Al Hilal ang Brazillian superstar sa iya nga paghampang sa nasambit nga club kag sa tanan nga iya kontribusyon.
Ang 32-anyos nga football superstar ang pito ka beses lamang nga nakahampang sumugod sang nagsulod ini sa club sadtong August 2023 sa pihak sang ginabaton nga sweldo nga $104 million kada tuig.
Matandaan nga si Neymar ang kabahin sang duha ka ginakabig nga pinakadaku nga team transfer sa kasayayan sang football sa bug-os nga kalibutan.
Una sang nagsulod ini sa Paris Saint-Germain gikan sa Barcelona sang 2017 sa balor nga 220 million euros ($230 million), kag pangaduha sadtong nagsulod naman ini sa Al-Hilal sadtong August 2023.
Duha ka bulan sumugod sang nagsulod sa Al Hilal, dalayon nga na-injure ang iya duha ka tuhod samtang nagahampang sa World Cup qualifier sadtong October 2023 nga nangin rason sang isa ka tuig sini nga indi paghampang.
Si Neymar ang isa sa mga highest-paid football superstar sa bug-os nga kalibutan, kaupod ang kapareho nga superstar nga si Cristiano Ronaldo.
