Magasugod na ang National Food Authority (NFA) sa pagbakal sang preska kag basa nga palay (unmilled rice) sa mas mataas nga presyo umpisa sa Setyembre.
Suno kay NFA Administrator Larry Lacson, ginalauman nga magadugang pa ang kita sang mga lokal nga mangunguma sa tion nga ipatuman na ang bag-o nga pricing scheme, kadungan sang pagsugod sang harvest season sa pungsod.
Gikan sa P17 kada kilo, pataason sang ahensya ang buying price sang wet rice sa P21 kada kilo. Nagakahulugan ini sang dugang nga P4 kada kilo sa kita kag benepisyo sang tagsa ka mangunguma.
Apang gin-athag ni Lacson nga ang ini nga programa una nga limitado sa mga lugar nga may kaugalingon nga rice drying facilities ang NFA.
Sa subong, padayon ang pagpangabudlay sang NFA field offices sa nagkalain-lain nga rehiyon sa pagpangita kag pagpakig-angot sa available drying facilities agud ang pagbakal sang wet rice ang mapatuman sa bug-os nga pungsod.
