Liwat nga ginpaidalum sang National Grid Corporation of the Philippines (NGCP) sa red alert status ang Visayas Grid bangud sang padayon nga kakulangan sa suplay sang kuryente sa rehiyon.
Sa interview sang Bombo Radyo kay Reagahn Alcantara, Lead Specialist, Public Relations Department sang National Grid Corporation of the Philippines, iya ginpahayag nga epektibo ang red alert halin alas-3:00 sang hapon tubtob alas-10:00 sang gab-i, samtang ginpatuman man ang yellow alert halin alas-2:00 tubtob alas-3:00 sang hapon kag alas-10:00 tubtob alas-11:00 sang gab-i.
Suno kay Alcantara, 2,379 megawatts na lang ang available capacity sang Visayas Grid samtang naglab-ot sa 2,574 megawatts ang peak demand, rason nga nagresulta ini sa kakulangan sang suplay sang kuryente.
Samtang, ginpahayag man sang NGCP nga may 15 ka planta nga yara sa forced outage subong nga Mayo 2026, kag may 11 pa ka planta nga naga-operate sa derated capacities, nga nagresulta sa kabug-usan nga 883.1 megawatts nga indi magamit sang grid.
Gin-athag man sang natungdan nga ginadeklara ang red alert kon indi na bastante ang suplay sang kuryente agud masolusyunan ang kinahanglanon sang mgakonsumidor kag reserve requirement sang transmission grid, samtang ang yellow alert nagakahulugan sang manipis nga operating margin para sa contingency requirement sang grid.
