MANILA, Philippines – Nagpagwa sang kasugtanan ang Nickel Asia Corporation sa San Juanico Resources Corporation agud mag-usisa sang mga mineral resources matapos maglagda sang operating agreement para sa probinsya sang Zambales.
Suno sa kompanya, ang Samar Nickel Mining Resources Corp. ang nagpasulod sang kasugtanan upod sa San Juanico Resources Corp., nga nagapanag-iya sang mineral rights sa isa ka lugar nga nagalab-ot sa 3,432.07 ka ektarya sa mga banwa sang Candelaria kag Sta. Cruz, Zambales.
Ang amo nga lugar sakop sang isa ka 25-anyos nga Mineral Production Sharing Agreement ukon MPSA sa gobyerno sang Pilipinas.
Ginpahayag sang Nickel Asia nga maga-epektibo lamang ang nasambit nga kasugtanan sa tion nga maaprubahan ini sang Mines and Geosciences Bureau ukon MGB.
Sa karon, wala pa sang ginpaguwa nga dugang nga detalye ang kompanya may kaangtanan sa timeline ukon iban pa nga mga kinahanglanon para sa implementasyon sang proyekto.
Ang Samar Nickel Mining Resources Corp. nagatutok sa eksplorasyon, pagmimina kag pag-export sang mineral ores, bisan wala pa ini nakasugod sang komersyal nga operasyon.
Samtang, nagapadayon ang operasyon sang unom ka mina sang Nickel Asia kag mga subsidiary sini sa nagkalainlain nga bahin sang pungsod lakip ang Palawan, Surigao del Norte, Eastern Samar, Dinagat Islands kag Isabela.
Nahibaluan nagpagwa ang mga ini sang saprolite kag limonite nga mga klase sang nickel ore, samtang nagapalapad man ang kompanya sang pamuhunan sa renewable energy projects pareho sang solar kag geothermal pinaagi sa ila subsidiary nga Emerging Power Inc.
