Nagpatigayon sang Night Earthquake Drill ang Provincial Disaster Risk Reduction and Management Unit (PDRRMU) sa Mambusao District Hospital sang Hunyo 1 bilang kabahin sang padayon nga kampanya sang probinsya para mapalig-on ang kahandaan sa tion sang kalamidad.
Sa pagpanguna sang administrasyon ni Governor Fredenil “Oto” H. Castro, nag-upod sa drill ang mga doktor, nurse, empleyado, pasyente kag mga bisita sang ospital.
Ginhiwat ang aktibidad sang gab-i agud masiguro kag mapauswag ang kapasidad sang ospital sa pagresponde sang husto sa tion sang linog, labi na sa mga sitwasyon nga limitado ang suga kag mas manubo ang numero sang duty personnel.
Gintudluan man ang mga partisipante sang nagakaigo nga evacuation procedures, safety protocols kag organisado nga pagresponde sa emerhensya.
Nangin drill evaluators naman ang mga representante halin sa Philippine Institute of Volcanology and Seismology, Capiz State University DRRM, Department of Health Capiz, Philippine Red Cross, Philippine National Police, Bureau of Fire Protection kag mga MDRRMO sang Sapian, Sigma, Jamindan kag Mambusao.
Suno sa PDRRMU, ang amo nga inisyatibo nagatinguha nga mapabakod ang kaluwasan kag kahandaan sa sulod sang mga health facility sa probinsya.
