Dakop ang isa ka lalaki nga ginakabig nga No.7 Provincial Most Wanted Person matapos nga ma-serbahan sang warrant of arrest sang mga kapulisan sang Pontevedra Municipal Police Station sa Barangay Malag-it, Pontevedra, Capiz alas 10:23 sang aga sang Sabado, Agosto 15.
Ang operasyon ginpatigayon sa idalom sang pagpamuno ni Police Colonel David L. Cachumbo, Jr. OIC sang Capiz Police Provincial Office ukon CPPO.
Ginkilala lamang ang naaresto sa alyas nga “Jepoy” kag siya ginserbahan sang warrant of arrest bangud sa mga kaso nga may kaangtanan sa illegal possession of firearms, illegal possession of dangerous drugs, kag illegal possession of explosives.
Lakip diri ang kaso sa idalom sang Section 28, Paragraph A sang Republic Act No. 10591, ukon ang Comprehensive Law on Firearms and Ammunition, nga may kaangtanan sa Paragraph E-1, article V sang nasambit nga layi.
Ginpangatubang man sang suspek ang kaso sa idalom sang Section 11, Article II sang Republic Act No. 9165, ukon Comprehensive Dangerous Drugs Act of 2002, nga may kaangtanan sa Section 15, Article II.
Base sa impormasyon sang kapulisan, may rekomendado nga piyansa nga 120 mil pesos para sa kaso nga may kaangtanan sa illegal nga pagkapot sang armas-luthang.
Sa subong, yar ana sa kustodiya sang Pontevedra Municipal Police Station ang suspek para sa nagakaigo nga disposisyon kag pagpatuman sang nagakaigo nga legal nga proseso.
Suno sa Capiz Police Provincial Office, ang madinalag-on nga pag-aresto kabahin sang padayon nga pag-intensify sang kampanya sang kapulisan batok sa mga wanted person sa bug-os nga probinsya. Samtang, ginpahayag sang Capiz Police Provincial Office nga magapadayon ang ila commitment sa pagpatuman sang kalinong kag katawhayan sa bug-os nga probinsya, paagi sa maid-id nga pagpatuman sang layi kag pagpalig-on sang koordinasyon kag pakig-angot sa komunidad.
