ROXAS CITY – Ilabi pa nga pasangkaron ang ‘no quarantine pass, no entry’ policy kag pagdumili sang pagbiyahe sang mga tricycle sa siyudad sang Roxas.
Ini ang ginpahayag ni Roxas City Mayor Ronnie Dadivas kasunod sang iya nanotaran nga daw kasubong nagapinagusto na lamang sang guwa ang mga tawo sa ila balay kag mangin ang mga tricycle nga nagabiyahe.
Suno kay Dadivas nga madamo na ini sang reports nga nabaton nga kasubong naggutok na ang siyudad sa mga tawo kag mga tricycle sa pihak nga ginpalawig pa tubtob sa Abril 30 ang Enhanced Community Quarantine bangud sang coronavirus disease (COVID-19) pandemic.
Bangud diri, nagpatawag sang sinapol si Dadivas sa Traffic Management Unit kag Philippine National Police agud ilabi pa nga paga-estriktuhon ang pagsulundan sa pagpatuman sang ECQ.
Suno kay Dadivas nga sa idalom sang ECQ, suspendido ang biyahe sang tanan nga public transports kalakip na ang tricycle kag ang makaguwa nga pumuluyo amo ang mga quarantine pass holders na gid lamang.
Indi naman sakop sa nasambit nga pagsulundan ang mga private vehicles kag tricycles nga nagadul-ong sang mga isa ka persona sa iya trabaho ukon may karga nga essential goods.
Wala man sang dapat nga problemahon ang mga tricycle drivers sa siyudad suno sa alkalde bangud ginatinguhaan man sang gobyerno sang siyudad nga hatagan sang ‘food security’ ang mga apektado sang ECQ.
Kalakip sa nangin inisyatibo sang gobyerno sang siyudad suno sa alkalde amo ang pagpanghatag sang tunga sa sako nga bugas sa mga kabaranggayan.
Mahimo suno sa alkalde nga magpangatubang sa nagakaigo nga penalidad ang sinuman mapamatud-an nga nagalapas sa nasambit nga pagsulundan.
Ginahimud-usan man sang gobyerno sang siyudad nga maka-designar sang shuttle ukon salakyan nga magalibot sa siyudad nga mahimo masakyan sang mga frontliners, mga may trabaho, kag mga quarantine pass holders.
