Pila ka mga progresibo nga grupo ang nagtingob sa pagtukod sang Network Opposed to Pax Silica ukon NO to Pax Silica, nga nagapanawagan sang pagpamatok sa plano sa pagpauswag sang Pax Silica sa New Clark City, Tarlac.
Sa interview sang Bombo Radyo kay France Castro, former ACT Teachers Party-list Representative, iya ginpahayag nga mahimo nga magdala sang oportunidad sa ekonomiya ang nasambit nga proyekto apang kinahanglan man nga usisaon ang epekto sini sa palibot, palangabuhian kag komunidad nga posible maapektuhan bangud sang development.
Suno kay Castro, lakip sa mga nagapanguna nga isyu nga ginpalab-ot sang grupo amo ang posible displacement, paggamit sang dunang manggad kag epekto sa kinamatarung sang mga indigenous groups nga madugay na nga nagapuyo sa lugar.
Pahayag pa sini, dapat may fixed nga plano kag model sang nasambit nga pasilidad agud masiguro nga indi masakripisyo ang mga komunidad .
Dugang pa sang natungdan, kinahanglan sang maathag nga tinutuyo sang proyekto agud malikawan nga ulihi na ang tanan antes mahibaluan ang matuod nga epekto kag katuyuan sini.
