“No vaccine, no pay out” sa mga senior citizen, indi matuod – DSWD 6

ROXAS CITY – Wala sang mandu nagikan sa Department of Social Welfare and Development (DSWD) nga indi makabaton sang ila quarterly payout ang mga senior citizen kun wala mabakunahan sang COVID-19 vaccine ukon booster shot.

Ini ang ginpahayag ni Ms. Maricar Labinghisa, focal person sa DSWD Region-6 sang mainterview sang Bombo Radyo.

Suno diri, ang mandu sa ila sang national amu nga i-release ang social pension bakunado man sang COVID-19 vaccine ukon indi ang resipiyente.

Nahibaluan nga may pila ka mga katigulangan ang nagapangayo sang kaklaruhan sa nabatian nila nga impormasyon nga ginaalegar indi pag i-release ang ila social pension kun indi sila bakunado.

Indi man suno diri pwede nga manduan sang isa ka LGU ang DSWD nga indi pag i-payout ang pension bangud gid lamang wala sila nabakunahan.

Sa pihak nga bahin, ginpahayag ni Labinghisa nga nakasugod na sila sa pag-release sang 3^rd quarter nga social pension sa pila ka mga kabanwahan sa Capiz, sang bulan sang Hulyo, kag nagapadayon ini tubtob maubos ang mga banwa sa pagpanagtag.

Sa madason nga semana, patigayunon ang pag-release sang P1,500 nga social pension sa mga senior citizen sa banwa sang Cuartero, Panay kag Jamindan.