ROXAS CITY – Ginkumpirma ni Governor Esteban Evan Contreras II nga nakasugtan sang mga gobernador kag mga alkalde sa Western Visayas sa ginpatigayon nga sinapol nga mga residente lamang sang Region 6 ang pahanugutan nga makasulod kag dumilian sa gihapon ang mga bakasyunista ukon non residents nga makasulod sa mga kaprobinsiyahanan nga sakup sang Rehiyon 6.
Suno sa gobernador nga katuyuan sini nga maproteksyunan ang mga pumuluyo kag malikawan ang paglapta sang COVID-19.
Na-estoryahan man sa sinapol ang mangin operasyon sang mga malls, restaurants kag hotels sa idalum na sang new normal.
Nahibaluan nga maka-operate lamang ang mga hotels kun may yara na sila sang Authority to Operate gikan sa Department of Tourism.
Isa ini sa mangin rekisitos sang mga hotel owners agud mapahanugutan ang operasyon sang ila nga negosyo.
Posible man nga magabulig sa inspeksyon sa mga hotels ang mga tourism officers sa diin tsekyaron kun nagasunod sa minimum health standard sa idalum sang new normal ang tagdumalahan sang isa ka establisemento.
Samtang padayon man ang kunsultasyon sang gobernador sa Civil Aviation Authority of the Philippines (CAAP) angut naman sa mangin preparasyon kag pagsulundan sang probinsiya sa magaabot nga mga pasahero sa idalum na sang new normal.
