Tapaz, CApiz – Hugot nga ginakundenar sang New People’s Army (NPA) ang pagluthang-patay kay Punong barangay Julie Catamin sang Barangay Roosevelt, Tapaz, Capiz.
Sa nangin statement sang NPA pinaagi kay Ismael Garcia, spokesperson sang Mt. Baloy Command, NPA Central Front Panay ginakasubo sang hublag ang natabo kay Kapitan Catamin kag ginakundenar ang militar kag pulis nga yara sa likod sang krimen.
Gindepensahan man ni Garcia ang hublag batuk sa akusasyon sang militar sa diin sila ang ginatudlo nga responsable sa kamatayon sang punong barangay.
Ginapanindugan sini nga wala sang motibo ang NPA para himoon ang krimen bangud wala sang anuman nga reklamo gikan sa mga kubos nga pumuluyo nga ginapigos sila ni Kapitan Catamin.
Kun may grupo nga may motibo sa pagpatay sa punong barangay wala sang liwan kundi ang militar kag pulis nga tuyo pahipuson si Kapitan Catamin nga nagapanindugan nga planted lamang ang mga armas nga narekober sa mga ordinaryo nga sibilyan sa Barangay Rosevelt sang nagligad nga tuig nga ginkamatay sang pila ka mga indibidwal.
Nagapati si Garcia nga ginhimo ini nga tikang sang tropa sang gobyerno agud magtuga sang kahadluk sa mga pumuluyo ang natabo kay Catamin kag indi na sila magkaisog pa nga magpangita sang hustisya.
Samtang nag-apelar si Garcia sa publiko nga mabuligan sila nga mahatagan sang hustisya ang natabo kay Kapitan Julie Catamin.
