Roxas City— Ginpanginwala sang mga katapo sang New People’s Army (NPA) ang kahilabtanan sa ginaalegar pagpaulan sang bala sa detachment sang Citizen Armed Force Geographical Unit (CAFGU) sang tinalikdan nga gabi sa Barangay Katipunan sa banwa sang Tapaz, Capiz.
Suno sa media liaison officer sang Jose Percival Estocada, Jr Command Unit Igabon nga si Roja Panay, wala sang kamatuoran ang ginpaguha nga report sang militar angut sa ginaalegar harassment sa detachment sang CAFGU sa nasambit nga barangay bangud wala sang operasyon ang mga ini sa amo nga lugar.
Nagapati si Panay nga posibli nagahimo lang sang senaryo ang militar agud ma justify ang pila ka mga pagpang abuso nga ginabuhat sang mga ini batuk sa mga sibilyan kag dugang nga mapakamalaot ang imahe sang mga rebelde kapareho sang ginabuhat ni Presidente Rodrigo Duterte.
Magluwas sini, gin-athag man sang tagpamaba Jose Percival Estocada, Jr Command Unit Igabon nga wala man sang kamatuoran ang nagtuhaw nga report nga ang mga rebelde ang may kahimuan sa nagluntad nga pagpangsunog sang road grader sang damlag lang sa Barangay Mianay, Sigma nga ginapag-iyahan sang CLY-ABC Builders kag duha ka mga ten wheeler truck sang MBM Construction. Ginpanindugan sini nga gina divert lang sang militar kag kapulisan ang matuod-tuod nga resulta sang imbestigasyon bangud sa ila ginapangapinan nga mga interes.
Nagpasalig ini nga magapatigayon sila sang kaugalingon nga imbestigasyon agud matumod ang yara sa likod sang natabo nga serye sang pagpangsunog sang mga kagamitan sang mga contractor. Nagapati si Panay nga samtang indi malab-ot sang masa ang matuod-tuod nga reporma sa gobyerno padayon nga mapaslawan ang tropa sang gobyerno nga mapapas ang kubay sang mga rebelde.
