ROXAS CITY – Hugot nga ginapanindugan sang grupo sang New Peoples Army nga wala sang kamatuoran nga may nagluntad nga engkwentro sa tunga sang rebelde nga grupo kag tropa sang gobyerno sa Barangay Masaroy, Calinog, Iloilo.
Ini ang ginpahayag sang media liason officer sang Jose Percival Estocada, Jr. Command Unit Igabon nga si Ka Roja Panay sang mainterview sang Bombo Radyo.
Suno kay Ka Roja, wala sang engkwentro nga nagluntad sa tunga duha ka grupo kag nagpanindugan nga gin-raid sang mga suldado ang balay ni Remy Diaz kag gintamnan sang mga armas kag iban pa nga kagamitan nga ila ginpaguha nga ila mga recoveries.
Aminado naman si Ka Roja nga naga-upod man sadto sa ila hublag si Diaz apang madugay na ini nga naghalin sa ila nga grupo kag indi na ini konektado sa ila.
Gindugang pa ni Ka Roja nga propaganda lamang ini sang militar agud mapahamot ang liderato ni Lt. Col. Joel Benedict Batara bilang bag-o nga commanding officer sang 61st Infantry (Hunter) Battalion sang Philippine Army.
