ROXAS CITY – Nagapadayon sa karon ang hot pursuit kag clearing operations sang militar sa nagluntad nga engkuwentro sa tunga sang ginapahayag rebelde nga grupo kag mga miyembro sang 61st Infantry (Hunter) Battalion sang Philippine Army sa boundary sang Barangay Guinbialan kag Barangay Bongbongan, Maayon, Capiz.
Sa interview sang Bombo Radyo kay 61st IB Commander LTC Sisenando Magbalot Jr., ginpahayag sini nga nagdugay sang halos 15 minutos ang pagbayluhanay sang lupok sang militar kag kapin napulo ka mga miyembro sang Sangay sa Partido Platoon East sang NPA nga naga-operate sa banwa sang Maayon, Cuartero kag pila ka porsyon sang Iloilo.
Ginpahayag sang opisyal nga nagsugat-anay ang banas sang militar kag mga rebelde sa nasambit nga lugar bangud ginasulod sang rebelde nga grupo ang mga kabaranggayan sa diin nagapatigayon sang Community Support Program ang militar.
Amat-amat nga nakapalagyo ang mga rebelde samtang nagapadayon ang pagbayluhanay sang lupok sang magtimbang nga bahin.
Maswerte naman nga wala sang may napilasan sa nasambit nga insidente.
