Ginpanginwala sang National Security Council (NSC) nga nagpromisa ang Pilipinas sa China nga kakason sini ang US Typhon missiles system sa pungsod.
Suno diri nga wala naghimo sang anu man nga commitment ang Pilipinas sa People’s Republic of China kaangut sa nasambit nga isyu.
Sa baylo, gintan-ay suno diri ni Pangulong Ferdinand Marcos Jr. pinaagi sa media nga kakason ang mid-range missile system sa pungsod kung untaton sang China ang mga agresibo nga aksiyon sini sa West Philippine Sea apang tubtob subong wala sa gihapon suno diri sang may nabaton nga sabat ang pungsod.
Gin-eksplekar man ni Malaya nga ang missile system yara sa pungsod bangud may mutual defense treaty ang Pilipinas sa US kag kinahanglan suno diri sang mga suldado sang pungsod nga mangin pamilyar sa weapon systems sang mga partner kag kaalyado sang Pilipinas.
Ginhimo ni Malaya ang nasambit nga pahayag matapos ginsiling ni Chinese foreign ministry spokesperson Guo Jiakun nga nagpromisa suno diri ang Pilipinas nga temporaryo lamang ang deployment sang US Typhon missile system kag kakason sa pungsod pagkatapos sang military exercises.
Matandaan nga nag-abot sa pungsod ang Typhon missile nga nagikan sa US sadtong Abril 11, 2024 kag una nga gingamit sadtong Balikatan exercises kag nagpabilin na sa pungsod tubtub subong.
