Ginaagda ang publiko nga magpartisipar sa Fourth Quarter Nationwide Simultaneous Earthquake Drill (NSED) sa Nobyembre 5, 2026, alas-9:00 sang aga, agud mapauswag ang ihibalo kag kahandaan sang tagsa ka pumuluyo sa tion sang linog.
Ang NSED isa ka dungan nga paghanas nga ginahimo agud tudluan kag hanason ang publiko sa nagakaigo nga mga tikang nga dapat himuon kun maglinog.
Kabahin sang sini nga aktibidad ang pagsunod sa “Duck, Cover, and Hold” ukon ang pagduko, pagpanalipod sa idalom sang mabakod nga lamesa ukon iban nga proteksyon, kag paghawid sini tubtob nga mag-untat ang pag uyog. Sundan ini sang evacuation drill ukon ang hapsay nga pagevacuate halin sa mga puluy-an kag establisyemento pakadto sa natalana nga evacuation area ukon sa bukas nga lugar nga malayo sa posible nga mahulog nga mga butang kag naguba nga parte sang mga estruktura.
Suno sa katuyuan sang aktibidad, padayon nga ginatudlo kag ginapahibalo sa publiko ang husto nga mga tikang sa tion sang linog agud maibanan ang risgo kag malikawan ang mga posible nga casualty.
Magasugod ang programa sang NSED sa alas-8:00 sang aga, alas-9:00 sang aga, pagahimuon ang ceremonial pressing of the button bilang senyales sa pagsugod sang “Duck, Cover, and Hold” kag evacuation drill.
Ginapanawagan ang tanan nga magpakigbahin sa sini nga aktibidad agud mangin mas handa kag mas luwas sa tion sang linog.
