Nagsaka na sa 2,553,023 ka indibidwal ukon kabaylo sang 714,360 nga pamilya ang naapektuhan sang pagpanglaslas sang Bagyong Enteng kag habagat sa 10 ka rehiyon sa pungsod.
Sa ulihi nga datos sang National Disaster Risk Reduction and Management Council (NDRRMC), nagdangat na man sa masobra P698.9 million ang kahalitan sang kalamidad sa imprastraktura kun sa diin masobra 500 ka pasilidad kasubong sang mga karsada, buluthuan, flood control, tulay kag establishimento sang gobyerno ang naapektuhan.
Nasa 7,622 nga kabalayan naman ang nahalitan kun sa diin 493 ang totally damaged kag 7,129 ang partially damaged.
Nagdangat na man sa P658.9 million ang nahalitan sang bagyo sa sektor sang agrikultura nga nakaapekto sa 27,596 nga mangunguma kag tripulante.
Sa kabug-usan, yara na sa 39 nga syudad kag munisipalidad na ang ginpaidalom sa state of calamity bangud sa epekto sang bagyo.
