ROXAS CITY-Ginkompirmar sang tagpamaba sang Roxas City Police Station nga nagsaka ang numero sang mga indibidwal nga nagkaladakpan nga imbolbado sa Iligal nga droga kadungan sang pandemya.
Sa interview sang Bombo Radyo kay Police Master Sergeant Ramil Arcangeles ginpahayag sini nga base sa datos sang Roxas City Police Station humalin sadtong Enero tubtob Agosto may yara sang 23 tanan ka mga operasyon nga ginkasa sang mga kapulisan kun ikumparar sa kapareho nga period sang tinalikdan nga tuig nga may yara lamang sang 12.
Nahibaluan nga 30 ka mga drug suspek ang natigayon nga maaresto kun sa diin halos tanan sa ila ang ginpasakaan na sang panumbongon.
Ginabulubanta nga kapin sa 204 gramos sang iligal nga droga ang narekober sa mga naaresto nga mga suspek kun sa diin may yara sang estimated street market value nga nagalab-ut sa kapin P2 milyones
Gindugang pa ni Arcangeles nga kadam-an sa ila ang lunsay mga newly identified nga mga drug personalities.
Nagapati ang mga kapulisan nga bangud ini sa pigado nga pagpangabuhi dala sang pandemya ang nagtulod sa ila nga magduso sang iligal nga droga.
