ROXAS CITY – Naglab-ot na sa 310 ang numero sang mga nagkaladakpan nga naglapas sa No Helmet No Driving Ordinance, sumugod nga ginpatuman ini.
Sa interview sang Bombo Radyo kay Mr. Emil Miraflores Chief of operation sang Traffic Management Unit Roxas City, ginpahayag sini nga madamo sa gihapon nga mga drayber sang motorsiklo ang nagasuway sa amu nga ordinansa kung sa diin kun kaisa nagaresulta sang indi pag-intindihanay kag nagapalagyo pa.
Suno kay Miraflores, wala sila sang may ginapili sa tion nga madakpan nila ang isa ka indibidwal nga wala nagasuksok sang helmet subong man ang pasahero ukon angkas sini.
Ginklaro man sini nga wala sang salabton ang pasahero ukon angkas sang motorsiklo kun wala ini sang suksok sang helmet bangud ang drayber diri ang magapanabat kag magabayad sang nagakaigo nga penalidad.
Sa karun, mas ginpasangkad pa nila ang pagpangdakop kag pagbantay sa dalan agud matudluan nga mangin isa ka responsable ang tagsa ka mga drayber sang motorsiklo nga wala nagasuksok sang helmet.
Panugyan sini sa tanan ilabi na sa adlaw-adlaw nga nagamaneho sang motorsiklo, mas maayo nga magsuksok sang helmet subong man ang angkas agud malikawan nga magbayad sang penalidad kag sa wala ginalauman nga disgrasya.
