Naglab-ot na sa masobra 7,600 ang numero sang mga Overseas Filipino Workers (OFW) kag ila nga mga pamilya nga luwas nga nakapauli sa Pilipinas sa tunga sang nagapadayon nga tensyon sa Middle East, kasunod sang pag-abot sang panibag-o nga batch sang mga Pilipino halin sa Kuwait.
Suno sa Department of Migrant Workers (DMW), yara sa 196 ka mga OFW halin sa Kuwait ang madinalag-on nga napapauli sa pungsod sakay sang isa ka commercial flight.
Ang nasambit nga tikang ang kabahin sang mas ginpasangkad nga repatriation efforts sang gobyerno sang Pilipinas agud mapahalin sa peligro ang mga Pilipino nga apektado sang kinagamo sa rehiyon.
Ginsigurado sang DMW nga ang kada isa sa ila ang nahatagan sang bulig pinansyal, libre nga transportasyon papuli sa ila nga mga probinsya, kag temporaryo nga dayunan.
Base sa pinaka-ulihi nga record sang DMW, halin Marso 5 tubtob Abril 24 sini nga tuig, naglab-ot na sa eksakto 7,600 ka mga OFW kag ila nga mga dependents ang napabalik sa Pilipinas.
Halin sa kabug-usan nga numero, halos 7,000 ka mga indibidwal ang direkta nga nagbenepisyo sa government-funded repatriation.
Ginakabug-usan ini sang masobra 5,600 ka mga mamumugon kag masobra 1,300 ka mga dependents ukon himata sang mga ini.
Padayon naman nga nakatutok ang DMW kag ang Department of Foreign Affairs (DFA) sa sitwasyon sa Middle East agud nga mag-asister sa iban pa nga mga Pilipino nga luyag na nga makapauli sa pungsod.
