Naglab-ot na sa 13 ang mga napatay sa 7.1-magnitude nga linog nga nag-igo sa Kumamoto Prefecture sa isla sang Kyushu, southern Japan, samtang nagapadayon ang search and rescue operations sa mga lugar nga tuman nga naapektuhan.
Suno kay Bombo Myles Briones Beltran, International Correspondent sa Japan, iya ginpahayag nga padayon ang pagpangita sang mga rescue teams sa mga missing kag ginapatihan na-trap sa mga nagkalarumpag nga buildings sa palibot sang Kumamoto City kag iban pa nga apektado nga lugar.
Lakip sa pinakamalala nga insidente amo ang partial collapse sang AEON shopping mall sa Kashima, Kumamoto Prefecture, sa diin may mga casualties kag mga trabahador ang wala pa makita.
Sandig sa report sang mga otoridad, masobra 100 ka mga aftershocks ang na-record matapos ang linog.
Kapin sa 36,000 naman ka panimalay ang nagapabilin man nga wala sang kuryente, samtang linibo naman ka mga residente ang gin-evacuate bangud sa pamahog sang landslides kag aftershocks.
Padayon nga nagapaandam ang Japan Meteorological Agency sa posibilidad sang mas mabaskog nga aftershocks sa masunod nga mga inadlaw.
