Naglabot na sa indi magnubo sa 78 ka indibidwal ang napatay bangud sa tuman nga pagbinaha sa Texas, kalakip ang 28 ka kabataan, samtang nagapadayon sa gihapon ang pagpangita sa mga kabataan nga babaye nga missing gikan sa isa ka summer camp. Bangud sa kabalaka nga liwat nga pagbaha, gin-evacuate man ang pila ka volunteer responders.
Suno kay Sheriff Larry Leitha sang Kerr County sa Texas Hill Country, 68 ang napatay sa iya nga nasakupan, nga amo ang pinakagrabe nga gin-igo sang baha, kag kalakip diri ang 28 nga kabataan. Ginpahayag naman ni Gobernador Greg Abbott nga may dugang nga 10 ka napatay sa nagkalain-lain nga bahin sang Texas kag 41 pa ang missing.
Nagpalab-ot sang pagpakig-unong si President Donald Trump sa mga biktima kag iya ginpahayag nga magbisita siya sa lugar sa Biyernes.
Isa sa tuman nga naigo ang Camp Mystic, isa ka 100-year old nga Christian summer camp para sa mga bata nga babaye. Suno kay Leitha, 10 campers kag isa ka counselor gikan sa Camp Mystic ang missing sa gihapon.
Nag-ugat ang tuman nga pagbinaha bangud sa pag-awas sang Guadalupe River matapos nagbubo ang mabaskog nga ulan sa central Texas sadtong Biyernes, kadungan sang pagsaulog sang Adlaw sang Kahilwayan sang U.S.
Suno kay Nim Kidd, hepe sang Texas Division of Emergency Management, tatlo ang napatay sa Burnet County, isa sa Tom Green County, lima sa Travis County, kag isa sa Williamson County.
Sadtong Sabado, ginpahayag sang mga opisyal nga masobra 850 ka indibidwal ang naluwas, kalakip ang pila ka nagautay na lang sa mga puno, matapos nagbubo ang tubtob 15 pulgada (38 cm) sang ulan sa rehiyon nga yara sa mga 85 miles (140 km) naaminhan-nakatungdan sang San Antonio.
Dugang pa ni Kidd, nakabaton siya sang indi-kumpirmado nga report nahanungod sa additional nga pader sang tubig nga nagailig sa pila ka sapa sang Guadalupe Rivershed, bangud padayon sa gihapon ang pag-ulan sa kalupaan halin sang Biyernes.
Na-activate ang Federal Emergency Management Agency (FEMA) sang Dominggo kag nagpadala sang mga resources sa mga first responders matapos ideklara ni Trump ang isa ka major disaster, suno sa Department of Homeland Security.
Nagabulig man sa search and rescue operations ang U.S. Coast Guard gamit ang mga helicopter kag eroplano.
