Nagguha sa findings sang Commission on Audit (COA) nga lapaw sa “acceptable threshold” ang nausik nga COVID-19 vaccines sa idalom sang vaccination program sang gobyerno.
Sa special audit report nga ginhiwat sang komisyon nagikan sang Mayo 2023 tubtob Enero 2024 sa national inoculation campaign against COVID-19, nadiskubre nga yara sa kabug-usa nga 68,681,445 doses sa imbentaryo ang wala nagamit bangud sa pagbaton sang mga malapit nga magpaso nga mga bakuna kag operational mishandling.
Ini ang kabaylo sang 27% sang 251.8 million COVID-19 vaccines nga ginbakal sang gobyerno ukon sang mga lokal nga gobyerno ukon donasyon sang iban nga mga pungsod ukon foreign organizations.
Ang porsyento nga ini ang mas mataas sa ideal nga 25% nga gintalana nga “wastage allowance” sang Gavi, isa sa mga organisasyon nga ginakabug-usan sang COVAX facility nga nagahatag sang COVID-19 vaccines sa developing countries sa idalom sang cost-sharing scheme.
Pila sa mga bakuna nga nausik ang lapaw na sa ila shelf life nga yara sa 57.3 million doses ukon kabaylo sang 83% samtang ang nabilin naman ang may depekto, discoloration ukon may presensiya sang particulate matter, bangud sa temperatura, kalamidad kag sunog.
Pinakamadamo nga numero sang mga bakuna nga nausik ang nagikan sa AstraZeneca, Gamaleya, Janssen kag Moderna vaccines.
Samtang, ginkilala naman sa report sang COA ang mga hamon nga nakapabalabag sa national vaccination program sang gobyerno kalakip na ang vaccine hesitancy sang publiko, mga isyu sa logistics kag indi maayo nga kasanayan sa pagdumala sa mga bakuna
