Naglab-ot na sa 140 ang numero sang mga napilasan sa palupok, suno sa Department of Health (DOH).
Base sa datos nga na-record humalin Disyembre 21 tubtob Disyembre 30, mas manubo ini sang 23% ipaanggid sa 182 ka kaso nga na-record sa amo man nga period sang nagligad nga tuig suno kay DOH spokesperson Albert Domingo.
Lakip sa nagapanguna nga kabangdanan sang pagkapilas amo ang 5 Star, Boga, Kwitis, unlabeled ukon imported nga mga palupok, Pla-pla, kag Whistle bombs.
Ang mga lalaki nga naga-edad sang lima tubtob 19 amo ang kalabanan sang mga pasyente.
Suno kay Domingo, padayon ang monitoring sang DOH tubtob sa Enero 5.
Liwat niya nga ginpahanumdom ang mga ginikanan nga indi pagtugutan ang mga kabataan nga mag-uyat sang palupok.
Dugang pa sini,suportado man sang DOH ang pagpatuman sang anuman nga kasuguan nga magalimit sa pag-access sang mga palupok sa mga kabataan.
