Nagsaka na sa pito ang numero sang mga Pinoy nga napilasan sa pag-atake sa King Khalid International Airport sa Riyadh, Saudi Arabia suno kay Department of Migrant Workers (DMW) Secretary Hans Leo Cacdac.
Sa sini nga numero, isa ang yara sa kritikal nga kondisyon kag duha ang nagapabilin sa intensive care unit (ICU), samtang apat naman ang nakaangkon sang minor injuries kag nakaguwa na sa ospital.
Ginpahayag ni Cacdac nga ang DMW kag ang Migrant Workers Office (MWO), kaupod ang Overseas Workers Welfare Administration (OWWA) ang padayon nga nagabantay sa kahimtangan sang mga napilasan.
Naga-coordinate man ang ahensya sa pamilya sang mga biktima agud masiguro ang paghatag sang kinahanglanon nga bulig kag suporta.
Natabo ang pag-atake sa tunga sang nagalala nga tensyon sa rehiyon kasunod sang mga pag-atake nga may kaangtanan sa Houthi group sa Yemen.
Ginpanugyanan sang DMW ang mga Pinoy kag overseas Filipino workers (OFWs) nga kumpirmahon ang ila flight schedule sa mga airlines antes magpadulong sa airport kag magpamati sa mga advisories halin sa mga otoridad.
