Naglab-ot na sa pito ang nareport nga missing bangud sa malapnagon nga pagbaha sa pungsod tuga sang Bagyo Crising kag ang southwest monsoon
Base sa pinakaulihi nga report sang Office of Civil Defense (OCD), kalabanan sa ila ang gin-anod sang tubig baha samtang ang isa ang yara sa fishing boat nga nagkulob bangud sang mabalod nga kadagatan.
Suno kay OCD Deputy Spokesperson Diego Mariano, padayon pa nga ginapaidalom sa validation ang tanan nga pito ka mga tawo nga ginreport nga missing agud mahibaluan kon lunsay sila resulta sang Southwest monsoon kag bagyo nga Crising.
Padayon pa suno sa iya ang pagpangita sa nagkalain-lain nga bahin sang pungsod, sa pagbinuligay sang nagkalain-lain nga search and rescue personnel.
Samtang, sa lima ka tawo nga ginreport nga napatay bangud sa epekto sang kalamidad, duha pa lang ang na-validate samtang padayon pa nga ginapaidalum sa validation ang nabilin nga tatlo.
Suno kay Mariano, may kabug-usan nga 167 ka seksyon sang dalan ang na-record nga apektado sang malapnagon nga pagbaha kag landslides sa nagkalain-lain nga bahin sang pungsod.
Sa karon, 122 diri ang pasable samtang nagapadayon pa ang clearing operations sa 45 ka mga lugar. Suno kay Mariano, maga-isyu sang clearance ang Department of Public Works and Highways (DPWH) para sa nasambit nga mga dalanon, sa tion nga masiguro nga safe na ini nga agyan.
