ROXAS CITY – Ginkumpirma sang tagpamaba sang Provincial Health Office (PHO) nga nagapabilin sa Roxas Memorial Provincial Hospital ang panibag-o nga positive COVID-19 patient nga residente sang Barangay Dayao, Roxas City.
Ginpahayag ni Mr. Ayr Altavas nga ba-se sa resulta, positibo sa COVID-19 ang 25-anyos nga lalaki nga nakaangkon sang close contact sa isa man ka positive COVID-19 patient nga napatay sang damlag lang.
Nagapadayon man ang contract tracing sang Provincial Health Office sa mga nakasalamula sang amo nga pasyente agud mapaidalum sila sa monitoring.
Suno kay Altavas nga nagaguwa sa contract tracing nga si COVID-19 Patient No. 1 nga residente sang Jamindan kag yara na karon sa Western Visayas Medical Center sa Iloilo, ang nakahalubilo sa kapin 175 ka indibidwal, Patient No. 2 ang nakahalubilo saa 13 ka mga persona, ang napatay nga si Patient No. 3 nga taga Barangay Dayao ang naka-close contact sa 20 ka persona kag amo man si Patient No. 4 nga gikan man sa amo nga lugar.
Wala ginlakip sa listahan sang probinsiya ang isa ka nagpositibo nga PCG member bangud residente ini sang Aklan.
Nahibaluan man nga sa 35 ka mga indibidwal nga ginakabig high risk kag ginkuhaan sang specimen, isa lamang ang nagpositibo diri, 8 ang nagnegatibo kag 26 ka iban pa ang padayon nga ginahulat ang resulta sang ila ginpadala nga specimen.
Gintadlong man ni Altavas nga sa pito ka mga pasyente nga nagkalamatay kag gindudahan nga nagsuprer sang coronavirus disease 2019, anum ang negatibo sa amo nga balatian kag isa lamang ang nagpositibo.
Samtang nagpangabay si Altavas sa mga pumuluyo nga suportahan ang mga frontliners kag indi pag-idiscriminate, bangud ginabutang nila sa risgo ang ila kabuhi agud lamang magbulig tatap sa mga masakiton labi na sa mga PUI’s kag PUMs.
Ginpabugal man ni Altavas nga ang Roxas Memorial Provincial Hospital ang pinakauna sa Western Visayas nga gindesignar bilang COVID-19 hospital sa diin may grupo sang medical health workers nga nagatatap sa mga pasyente nga nagasuprer sang amo nga balatian.
