Nagsaka na sa 30 ang bilang sang mga nasawi sa pagbagsak sang siyam ka andana nga gusali nga ginatukod pa lamang sa Barangay Balibago, Angeles City, Pampanga, suno sa pinakahuling datos sang mga otoridad.
Ang insidente ang nagluntad sang Mayo 24 kag nagresulta sa malawig nga search, rescue kag retrieval operations bangud madamo nga construction workers ang na-trap sa idalom sang nagkatumpok nga semento, bakal kag iban pa nga materyales sang konstruksyon.
Suno sa mga awtoridad, padayon nga may mga bangkay nga ginarekober sa sulod sang gumuhong istruktura bisan nagligad na ang pila ka adlaw halin sang trahedya. Sa una nga bahin sang operasyon, masobra 20 ka mga trabahador ang naluwas kag nadala dayon sa ospital para sa nagakaigo nga bulong.
Gina-imbestigaran naman sang mga kinatuhuyan nga ahensya sang gobyerno ang posible nga kabangdanan sang pagguho sang gusali. Lakip sa ginatan-aw amo ang posible nga paglapas sa occupational safety and health standards kag iban pa nga safety regulations sa proyekto. Nauna man nga nagpaguwa sang work stoppage order ang Department of Labor and Employment (DOLE) agud maproteheran ang mga trabahador samtang nagapadayon ang imbestigasyon.
Samtang nagapadayon ang retrieval operations, nagapangayo sang hustisya ang mga pamilya sang mga biktima kag nagapanawagan sang mas istrikto nga pagpatuman sang mga safety standards sa mga construction projects agud malikawan ang kaangay nga trahedya sa masunod.
Nagapadayon naman ang paghatag sang bulig sang lokal nga panguluhan kag nagkalain-lain nga ahensya sa mga pamilya sang mga nasawi kag naapektuhan sang insidente samtang ginalauman ang resulta sang mas lawig nga imbestigasyon sa kaso.
