ROXAS CITY – Indi makapati ang isa ka nurse nga nagatrabaho sa pribado nga ospital sa syudad sang Roxas nga maka-experiensiya sang diskriminasyon gikan mismo sa iya landlady.
Sa exclusive interview sang Bombo Radyo Roxas ka Mr. Benn Aaron Santiago, gintuad sini nga nakibot siya sang ginprangka sang landlady nga magpangita na lamang sang boarding house bangud indi na sila magbaton sang mga nurses.
Nasakitan si Santiago sang mahibaluan ang rason sang landlady sa pagpahalin sa iya amo ang iya trabaho bilang isa ka nurse sa diin natublag ang gina-estaran sa nabaton nga mga impormasyon angut sa coronavirus disease (COVID-19) nga malapnagon sa karon.
Nagaguwa suno kay Santiago nga kasubong ginakangil-aran ang trabaho sang mga frontliners nga kun tan-awon, ila ginasakripisyo ang kabuhi agud magtatap sa mga masakiton.
Aminado ini nga sadto maayo man ang pagtratar sa iya sang landlady apang hinali nagbag-o sang mangin malapnagon na ang COVID-19.
Ginkumpirma man sini nga indi lamang siya ang naka-experiensiya sang diskriminasyon, bangud may iban nga mga frontliners nga sa ila pagbalik sa ginateniran nga boarding house, yara na sa guwa sang balay ang ila kagamitan.
Wala man gintago ni Santiago ang kahadluk nga nabatyagan sa ila nga trabaho, apang ginapabakud lamang sila sang ila ginsumpaan bilang mga nurses.
Samtang iya man ginpasiguro nga antes sila magtatap sa mga PUI’s nga nagapaidalum sa hospital quarantine, nagasuksok sila sang Personal Protective Equipment (PPE) agud indi ma-infect sang virus.
May pagsulundan man sila sa pagdispose sang PPE agud indi maglapta ang kagaw.
Nagpanawagan man si Santiago sa publiko nga mangin considerate sa ila kag
respetuhon ang mga frontliners.
Nag-apelar man ini sa mga opisyales sang gobyerno nga indi pagpabayaan ang mga frontliners kag ipabatyag ang ila suporta.
Nahibaluan nga isa na ka tuig nga nagatrabaho bilang nurse si Santiago sa isa ka pribado nga ospital.
