ROXAS CITY – Nagpa-rekord sa Roxas City Police Station ang isa ka nurse nga nagaserbi nga frontliner kontra coronavirus disease (COVID-19) matapos ginpahalin ini sa iya gina-estaran nga boarding house sa Rooseville Heights, Barangay 11, Roxas City.
Base sa ginparekord ni Benn Aaron Santiago, 22 anyos kag residente sang Sigma, Capiz, ginkakibot sini sa iya pag-abot sa iya nga boardinghouse sang ginhambalan siya sang iya landlady nga magpangita na ini sang iban nga maestaran.
Suno diri nga ginhambalan siya nga indi na magbaton sang boarders nga nurse ang ila boardinghouse.
Wala naman napunggan ni Santiago nga ipalayag ang iya pagkadismaya sa nasambit nga hitabo pinaagi sa isa ka post sa iya nga social media account.
Suno diri nga tuman siya nga nasubuan bangud sang diskriminasyon sa ila sa pihak sang ila sakripisyo bilang frontliners.
Nagpanawagan man ini sa lokal nga gobyerno nga aksiyunan ini bangud suno sa iya indi lamang siya ang naka-eksperyensiya sang kasubong sini nga diskriminasyon.
