Obiena may daku nga tyansa nga makakuha sang bulawan nga medalya sa Olympics – PATAFA

Kumpiyansa si Philippine Athletics Track and Field Association (PATAFA) Secretary General Jasper Tanhueco, nga makakuha sang bulawan nga medalya sa Paris Olympics si EJ Obiena.

Ginpahayag sini nga tuman sa karon ang ginahimo nga paghanas sang 28-anyos world number 2 pole vaulter kun sa diin madinalag-on ang mga nakaligad sini nga torneo.

Apisar yara ini sa pang-apat nga puwesto sa Meeting de Paris sa France sini nga semana, ginakabig sa gihapon ni Obiena nga isa ini ka maayo nga ensayo.

Sa karon, yara sa training camp si Obiena kaupod ang coach sini nga si Vitaly Petrov para sa last stages sang ila nga ppreparasyon sa Olympics. Target sini nga makabawi bangud nagtapos ini sa pang-11 sang tinalikdan nga Tokyo Olympics.