PRESIDENT ROXAS, CAPIZ – Ang mga concern nga ginpalab-ot sang mga pumuluyo sang President Roxas, Capiz ang nagtulod sa pila ka mga katapu sang Sangguniang Bayan nga magpatigayon sang ocular inspection sa bag-o tukod nga merkado publiko.
Ginpahayag ni SB member Bojit Bieles nag-ugat ang ila pagtsekyar sa newly construct public market sa ila banwa agud hibaluon ang kamatuoran sa nabaton nga report sang mga concerned citizen.
Kalakip sa nakita nga problema sang grupo ni Bieles ang steel gate sa entrance sang merkado, stalls nga dapat ginpahamtangan na sang tiles kag ang canope sang nasambit nga facilidad.
Ginpangita man sini ang feasibility study nga ginpatigayon sa amo nga proyekto apang wala ginahatag sa ila.
Ginakwestyon man sang opisyal ang duha ka Certificate of Completion and Acceptance sa nasambit nga proyekto.
Suno kay Bieles nga napetsahan Oktubre 25, 2019 ang una ginpaguwa nga Certificate of Completion and Acceptance kag ang ikaduha nga mismo ginhatag sang municipal engineer sang banwa nga si Engr. Ramon Burgos sa Sangguniang Bayan nga napetsahan Pebrero 21, 2020.
Klaro nga wala nagasibo ang petsa sang duha ka mga dokumento nga naghatag karon sang palaligban sa ila.
Batunon lamang sang ila local chief executive ang nasambit nga sertipikasyon kun natapos na sang kontraktor ang proyekto.
Ginbuyagyag man ni Bieles nga ila man ginpatawag si Engr. Burgos para magtambong sa sesyon agud masabat ang pila ka mga palamangkutanon, apang ba-se sa ginpadala nga sulat sang inheyero nga handa ini nga magtambong sa sesyon para maathagan ang mga palamangkutanon apang indi siya pagpahanugutan sang alkalde sang banwa.
Ginpanindugan man sini nga wala nila ginapatalang ang mga pumuluyo bangud ginahimo lamang nila ang ensakto nga serbisyo publiko sa diin sila ang nagaserbe nga tingog sang mga pumuluyo.
