ROXAS CITY – Epektibo sa Hunyo 1, 2020 ipatuman ang ‘Odd-Even Scheme’ sa maga-biyahe nga mga tricycle sa siyudad sang Roxas.
Ini matapos nga gin-aprubahan sa sesyon sang Sangguniang Panlungsod ang pag-amyenda sang Ordinance 019-2020, partikular ang Sections 2 kag 7 sang nasambit nga ordinansa.
Suno kay City Councilor Albert Gregory Potato, nag-sponsor sang nasambit nga ordinansa, gikan sa ‘Number-Coding Scheme’, ipatuman na ang ‘Odd-Even Scheme’ para sa mga tricycle drivers and operators sa siyudad.
Bangud diri suno sa iya, 50 porsyento sang kabug-usan nga franchise holders sa siyudad ang mahimo nga makabiyahe sa sulod sang isa ka adlaw.
Sa idalom sang nasambit nga pagsulundan, halos apat ka adlaw sa sulod sang isa ka semana mahimo nga maka-biyahe ang isa ka tricycle.
Sa idalom sang ‘Odd-Even Scheme’, ang mahimo maka-biyahe sa adlaw sang Lunes, Miyerkules kag Biyernes amo ang mga tricycle nga may city number nga nagatapos sa 1-3-5-7-9 (odd numbers).
Sa mga adlaw sang Martes, Huwebes kag Sabado amo ang mga tricycle nga may city number nga nagatapos sa 2-4-6-8-0 (even numbers).
Samtang sa adlaw sang Dominggo, mahimo maka-biyahe ang tanan nga mga tricycle.
Apang ginpanindugan sang konsehal nga magapabilin sa gihapon ang hugot nga pag-obserbar sang mga health protocols kapareho sang pagsuksok sang face mask sang driver kag pasahero kag pag-limita lamang sa isa ka pasahero sa kada tricycle.
