Ginpasalig sang Office of Civil Defense (OCD) Region 6 nga handa ang ahensya sa tion nga mag-igo ang mabaskog nga linog sa Western Visayas, ilabi na sa mga lugar malapit sa Negros Fault Line.
Sa interview sang Bombo Radyo kay Director Raul Fernandez sang Office of Civil Defense (OCD) Region 6, iya ginpahayag nga padayon ang ila pagmonitor sa tanan nga high-risk areas agud gilayon nga matumod kag marespondehan ang anuman nga pamahog nga tuga sang linog.
Suno kay Fernandez, nagapatigayon man sang hazard mapping ang ahensya agud matumod ang mga komunidad kag imprastraktura nga posible maapektuhan sang mabaskog nga linog.
Pahayag pa niya, regular nga nagapatigayon sang earthquake drills ang talatapan kag iban pa nga disaster preparedness, partikular sa mga vulnerable areas kaangay sang ospital kag eskwelahan.
Tinutuyo sini nga masanay ang mga pumuluyo kag staff kun paano magresponde sang husto sa tion nga magluntad ang linog.
Samtang, padayon naman ang panawagan sang OCD Region 6 sa publiko nga mangin alerto kag preparado sa tanan nga oras.
Gin-engganyo naman sang natungdan ang mga pumuluyo nga magpartisipar sa mga disaster preparedness activities, magtuon parte sa evacuation procedures, kag magpreparar sang emergency kits para sa ila kaluwasan.
