Nagpagwa sang paandam ang Office of Civil Defense (OCD) Region VI sa publiko angut sa posible epekto sang tuman nga kainit tuga sang Super El Niño.
Sa interview sang Bombo Radyo kay Mr. Raul Fernandez, Director sang OCD Region VI, iya ginpahayag ang importansya sang temprano nga preparasyon agud malikawan ang malain nga epekto sang mataas nga temperatura.
Suno kay Fernandez, lakip sa mga dapat ihandanan amo ang posible nga kakulangan sa supply sang tubig, epekto sa ikaayong lawas, agrikultura kag enerhiya.
Ginpanugyanan ang publiko nga mag-inom sang bastante nga tubig, likawan ang malawig nga pag-expose sa adlaw kag maggamit sang payong ukon iban pa nga heat protection kun kinahanglanon sa paggwa.
Ginpahanumdom man ang mga ginikanan nga bantayan ang mga kabataan kag mga tigulang bangud mas mataas ang risgo nga maka-eksperyensya sang dehydration kag iban pa nga balatian nga may kaangtanan sa init.
Ginalauman nga magalab-ot sa 42 degrees Celsius ang heat index sa syudad sang Roxas subong nga adlaw, gani liwat nga gina-engganyo ang publiko nga maghalong kag likawan ang malawig nga pagbulad sa adlaw.
