Ginkumpirmar sang Office of Civil Defense Region 6 nga wala sang narekord nga property damage kag wala sang casualty sa Western Visayas bangud sa halit nga dala sang bagyo Basyang.
Sa interview kay OCD-6 Director Raul Fernandez, iya ginpahayag nga nagapabilin nga malig-on ang sitwasyon sa rehiyon, kasunod sang madasig nga pagpanghanda kag koordinasyon sang lokal nga panguluhan kag disaster response units.
Ini matapos nga gin-lift ang wind signal kag sang ulihi nagluya ang Bagyo Basyang sa low pressure area na lang.
Suno kay Fernandez, padayon pa ang monitoring sang ila talatapan, ilabi na sa mga lugar nga ginakabig nga flood-prone kag landslide-prone, agud masiguro ang kaluwasan sang mga pumuluyo sa tion nga magpadayon ang pag-ulan.
Gindugang sini nga nagapabilin nga naka-standby ang mga response teams kag handa ang mga relief goods sa anuman nga posible epekto sang malain nga panahon.
Liwat nga ginpahanumdoman sang Office of Civil Defense ang publiko nga magpabilin nga alerto kag magpamati sa mga abiso sang lokal nga panguluhan kag otoridad.
