Padayon ang monitoring sang Office of Civil Defense (OCD) Western Visayas sa sitwasyon sang haze sa rehiyon.
Sa interview sang Bombo Radyo kay Mr. Raul Fernandez, Office of Civil Defense (OCD) Western Visayas Regional Director, iya ginpahayag nga halos tanan nga probinsya sa Region VI ang apektado sang madakmol nga aso nga naghalin sa wildfire bahin sang Indonesia.
Suno kay Fernandez, padayon man nga ginamonitor sang mga otoridad ang kalidad sang hangin sa nagkalain-lain nga lugar sa rehiyon agud mahibaluan ang epekto sini sa ikaayong lawas sang publiko.
Pahayag pa niya, maghalong ang mga yara sa vulnerable sectors, ilabi na ang mga kabataan, tigulang, mga nagabusong, kag may pre-existing nga balatian sa tagipusuon ukon baga, sa epekto sang haze.
Dugang pa sini, magsuksok sang face mask, ilabi na kon kinahanglan magguwa, kag likawan ang masami nga paguwa ukon dugay nga pagpabilin sa guwa sang balay samtang madakmol ang haze.
Nagapangabay man ang natungdan sa publiko nga magkooperar kag magsunod sa mga health advisory sang mga awtoridad agud malikawan ang posible nga problema sa panglawas bangud sa haze.
