Nagpakigbahin ang Office of Senior Citizen Affairs sang pila ka mga programa sang ila talatapan.
Sa interview sang Bombo Radyo kay Eddie Dela Cruz, head sang Office of Senior Citizen Affairs-Roxas City, iya ginpahayag nga ang ini nga mga programa ang gindihon agud nga makabulig sa mga katigulangan.
Suno kay Dela Cruz, sang Oktubre 16,may ara sang 353 ka mga octogenarian kag nonagetarian kag isa ka centenarian ang nakabaton sang ila sini nga pension.
Samtang, may ara man sang ginahatag nga pension ang ila nga talatapan para sa mga senior citizen sa nagkalain-lain nga category kun sa diin makabaton sang tag P1,000 kada bulan kag ini ang gina-release quarterly.
Pahayag pa niya, sa pag apply para mangin octenarian, ninetenarian kag centenarian, kinahanglan nga 4 ka bulan antes makalab-ot sa edad nga 80,85,90,95, ukon 100, makapasa na sa talatapan sang kopya sang Senior Cirizen ID kag iban pa nga valid ID’s kag 2×2 kag whole body picture.
Sa regular nga pension naman nga ginahatag, may yara sang mga priority maghalin sa 60-anyos pataas ilabi na ang mga persons with disabilities kag mga indigent na sang ila tagsa ka mga barangay.
Ang local government sang Roxas City, ang may ginahatag man nga pension kun sa diin makabaton sang katunga sa ginahatag sa regular pension.
Dugang pa niya, indi buot silingon nga senior citizen ka, insigida makasulod ka sa gilayon sa pension bangud ang Office of Senior Citizen Affairs-Roxas City ang validator lamang kag yara sa Regional kag National nga talatapan ang may desisyon sa pagpili sang mangin pensioner.
Nagpanawagan man ang natungdan sa mga kabataan nga atipanon sang maayo ang mga katigulangan agud nga mas malawig pa nga tinon ang ila nga igakabuhi sa kalibutan.
Interviewed by: Bombo Sunnie Mae Batencila and Bombo Francis Biñas via Good Morning Philippines
