Nakahanda na ang Office of the Civil Defense (OCD) Region 6 sa posible nga epekto sang El Niño phenomenon sa rehiyon.
Sa interview sang Bombo Radyo, kay Director Raul Fernandez sang Office of the Civil Defense Region 6, iya ginpahayag nga nagpatigayon na sila sang pagsinapol upod ang lain-lain nga ahensya sang gobyerno agud matumod kag mapreparahan ang ano man nga sahi nga sitwasyon.
Suno kay Fernandez, may pila ka local government units naman ang nagpasa na sang listahan sang mga lugar sa ila nasakupan nga ginakabig vulnerable ukon posible maapektuhan sang El Niño.
Dugang pa ni Fernandez, nagahanda man ang ila opisina sang pondo nga mahimo gamiton para sa paghatag sang kinahanglanon nga bulig sa mga local disaster risk reduction and management offices kon maglala ang epekto sang El Niño.
Samtang, gin-athag man sini nga ang mataas nga heat index nga nabatyagan subong ang indi pa direkta nga epekto sang El Niño kundi epekto sang dry season sa pungsod.
Nagpahanumdom man sang natungdan sa publiko nga magpabilin nga alerto, maghalong sa tuman nga init, kag siguruhon ang seguridad sang kaugalingon kag pamilya batok sa posible nga epekto sang mainit nga panyempo.
