Padayon ang monitoring sang Office of the Civil Defense – Region 6 sa kahalitan nga dala sang Bagyo Basyang.
Sa interview sang Bombo Radyo kay Director Raul Fernandez sang Office of the Civil Defense – Region 6 , iya ginpahayag nga padayon ang koordinasyon sang ila talatapan sa mga local disaster risk reduction and management offices kag local government units sang tagsa ka probinsya sa region 6 agud maghatag sang bag-o nga update nahanungod sa lokasyon sang bagyo.
Suno kay Fernandez, nagpatuman man sang pre-emptive evacuation sa kada lugar nga may mataas nga risgo sang pagbaha kag landslide kag ginpreparar man ang mga relief goods sa mga residente nga maga-evacuate.
Pahayag pa niya, padayon man ang ila pagbantay sa mga coastal areas agud pahanumduman ang mga magagmay nga sakayan nga likawan anay ang pagpalawod bangud sa mabaskog nga hampak sang balod.
Sa subong, wala pa sang nabalhag nga casualty kag kahalitan gikan sa nagkalain-lain nga probinsya kag syudad sa Region 6.
Nagapanawagan man natungdan sa publiko nga mangin aligmat kag siguruhon ang safety sang tagsa ka miyembro sang pamilya agud malikawan ang ano man nga klase sang insidente sa tunga sang pag-igo sang Bagyo Basyang.
