Ginpasa na sang Office of the Ombudsman Area Office for the Visayas para sa pagdesisyon ang pila ka administratibo kag kriminal nga kaso nga nalakip si former Sangguniang Panlalawigan Member Thea Faith Tinsay Reyes kag iban pa nga anay empleyado sang Sangguniang Panlalawigan sang Capiz.
Suno sa order sang Ombudsman nga gin-isyu sang Abril 20, 2026, gin-untat na ang pagbaton sang dugang nga mga dokumento ukon pleading nga may kaangtanan sa mga ini nga kaso, sandig sa Rules of Procedure sang ahensya.
Lakip diri ang kaso nga ginfile nanday Marynol F. Garcia kag Gemma F. Garcia may kaangtanan sa ginapahayag nga paglapas sa Section 3(e) sang Republic Act No. 3019 ukon Anti-Graft and Corrupt Practices Act, kag Conduct Prejudicial to the Best Interest of the Service.
May separado man nga kaso nga gin-endorso ni Fernando F. Garcia batuk kanday anay SP Member Thea Faith Tinsay Reyes kag anay Administrative Aide I Rosie Mae Suico Ferol sang Sangguniang Panlalawigan sang Capiz.
Ang order ginpirmahan ni Katherine A. Genovesa-Mahawan, Officer-in-Charge sang Preliminary Investigation, Administrative Adjudication and Prosecution Bureau-B, para kay Deputy Ombudsman for the Visayas Dante F. Vargas.
Bangud nga kompleto na ang proseso sang pagbaton sang mga dokumento kag pleading, ginahulat na ang resolusyon sang Ombudsman agud mahibaluan ang pinal nga aksyon sa mga kaso kag sa mga respondent.
