Ginbalita sang Commission on Audit (COA) nga naggastos ang Office of the President (OP) sang masobra P2.2 billion sa confidential funds (CF) sang 2023 kapareho sang 2022.
Base sa 2023 audit report, gin-athag sang COA nga gingamit ang nasambit nga balor sang Confidential Funds sa idalom sang OP para sa mga gastuson nga may kinaangtanan sa surveillance activities sa mga civilian government agencies agud suportahan ang mandato ukon mga operasyon.
Maluwas diri, naggastos ang OP sang P2.3 billion sa intelligence fund nga gingamit naman para sa mga expenses nga may kinaangtanan sa intelligence information gathering activities sang uniformed and military personnel, kag intelligence practitioners nga may direkta nga epekto sa pampungsudnon nga seguridad.
Naggastos man ang OP sang masobra P10 million para sa extraordinary kag miscellaneous expenses nga gingamit agud kilalahon ang balor sang ginbayaran para sa mga gastos nga naangut sa opisyal sa ila responsibilidad.
Sa kabug-usan, yara sa P4.57 billion ang naggastos sang OP sa confidential, intelligence, kag extraordinary expenses sang 2023. Ini ang mas mataas ikumparar sa P4.50 billion nga narekord sang 2022.
