Nagpadala ang Office of the Vice President (OVP) sang ila “Kalusugan Food Truck” agud maghatag sang suporta sa mga rescue personnel nga nagapadayon sang search, rescue kag retrieval operations kasunod sang mabaskog nga linog nga nagtay-og sa mga bahin sang Southern Mindanao sang Hunyo 8.
Sa impormasyon sang OVP, ginpwesto ang food truck malapit sa narumpag nga building sa Barangay Calumpang, General Santos City, nga isa sa mga lugar nga grabe nga naapektuhan sang linog.
Pinaagi sa inisyatibo, ginahatagan sang pagkaon kag iban pa nga kinahanglanon ang mga responder nga wala untat sa pagbulig sa mga biktima sang kalamidad.
Padayon naman ang operasyon sang mga rescue teams sa lugar samtang ginapangita pa ang posible nga mga na-trap kag ginabuligan ang mga residente nga naapektuhan sang linog.
Ginpahayag sang OVP nga ang paghatag sang suporta sa mga frontliner kag mga apektado nga komunidad kabahin sang ila pagpaninguha nga mabuligan ang mga lugar nga naapektuhan sang kalamidad kag emerhensya.
