ROXAS CITY – Nakapagkit na sang ikaduha nga Person’s Under Investigation ang probinsya sang Capiz bangud sa Novel Coronavirus Respiratory Disease (nCoV-ARD).
Ini ang base sa ginpaguwa nga official statement sang Capiz Provincial Health Office.
Isa ka 43-anyos nga babaye kag 17 na katuig nga nagatrabaho bilang domestic helper sa Hongkong ang nagapabilin karon sa isa ka ospital sa siyudad sang Roxas matapos nga ginapahayag nakitaan sang pila ka mga sintomas sang 2019 nCoV.
Nahibaluan nga Enero 19, 2020 nagpauli sa Pilipinas ang nasambit nga pasyente kag Enero 31, 2020 na ini nakabatyag sang pila ka mga sintomas sang nCoV kapareho sang ubo.
Bangud diri, nadesisyunan sang nasambit nga pasyente nga magpakonsulta kag gilayon man nga na-admit sa ospital sang Pebrero 3, 2020.
Sa karon, ginpadala na sa Research Institute for Tropical Medicine (RITM) sa Alabang, Muntinlupa City ang specimen sample sini kag ila pa nga ginahulat ang resulta sang amo nga eksaminasyon.
