ROXAS CITY – Nagapabilin sa Roxas Memorial Provincial Hospital ang pinakauna nga repatriated Overseas Filipino Worker (OFW) nga nagpositibo sa coronavirus disease (COVID-19).
Ginpahayag ni Mr. Ayr Altavas, Public Information Officer kag Health and Promotion Officer sang Provincial Health Office nga yara sa maayo nga kundisyon ang 48-anyos nga seafarer nga tumandok sang Barangay Switch, Tapaz, Capiz.
Kalakip ini sa Batch no. 7 sang mga repatriated OFWs sa probinsiya sang Capiz kag number 35.
Ba-se sa pagpangusisa sang talatapan nga may history of travel sa Osaka, Japan ang COVID-19 patient sa diin sa pagpauli nagtenir sa Cebu sa sulod sang pila ka bulan matapos nga naabtan sang lockdown.
Apang isa ini sa naka-avail sa repatriation program sang gobyerno kag kalakip sa nakasakay sa sweeper flight sa Iloilo kag ginsugat sang ambulance sang LGU sa banwa sang Tapaz kag nagdiretso sa quarantine facility sa amo nga banwa.
Bilang kabahin sang protocol suno kay Altavas ginpaidalom ini sa real-time polymerase chain reaction (RT-PCR) test kag pagkaligad sang pila ka adlaw nagguwa ang resulta nga positibo ini sa SARS COV 2, ang kagaw nga nagadala sang COVID-19.
Ginpahayag nga ‘asymptomatic’ ang nasambit nga OFW ukon wala nakitaan sang anuman nga sintomas sang nasambit nga balatian.
Ginkumpirma man ni Altavas ang pagpaidalum sa isolation, strict home quarantine ukon community facility quarantine sang mga na-expose ukon nakaangkon sang close contact sa amo nga OFW kag pagakuhaan man sila sang specimen agud masigurado kun nalatnan sila ukon wala sang COVID-19.
Ginpasiguro man ni Altavas ang pagpatigayon sang disinfection sa hulot nga ginteniran sang amo nga OFW sa quarantine facility sa banwa sang Tapaz agud indi maglapta ang balatian.
