ROXAS CITY – Wala napunggan sang isa ka OFW sa France nga mangin emosyunal samtang ginasaysay sa Bombo Radyo ang na-experiensiyahan sini sang mangin positive sa coronavirus disease 2019 ang hinipo nga anak.
Sa report ni Bombo International Correspondent Jennefer Fufunan Faldas, tumandok sang Barangay Poblacion, Dumalag, Capiz kag nagatrabaho sa France, ginpahayag sini nga halos magwaras siya sang indi pagpasudlon sa ospital matapos gindala ang anak nga naka-experiensiya sang kabudlayan sa pagginhawa kag mataas nga lagnat.
Suno kay Faldas bilang iloy, indi ini mahim-us labi na nga wala nakita ang sitwasyon sang anak matapos nga kumpirmahon sang doktor nga positibo ini sa COVID-19.
Naghulat ini sa guwa sang ospital para mahibaluan ang sitwasyon sang anak kag hugot nga nagpangamuyo para maluwas ang hinipo nga anak bangud nahibaluan sini nga makamamatay ang nasambit nga sakit.
Nagdugay sang siyam ka adlaw sa ospital ang anak tobtob nga nakapauli ini sa ila balay.
Apang wala ginalauman nga nalatnan ang duha pa ka mga anak kag sa kahadluk nga indi naman makita ang mga kabataan, ginpakamaayo na lamang sini nga indi pagdalhon sa ospital kag didto na lamang sa ila balay ginbulong sa pamaagi nga nahibaluan sini makabulig para mag-ayo ang pamatyag sang mga anak kasubong sa pagpainum sang tubig nga may luy-a.
Bangud sa nangin experiensiya ni Faldas sa tatlo ka mga kabataan nga nangin COVID-19 patient nagpanawagan ini sa mga Filipino nga sundon ang tanan nga panugyan sang gobyerno, maggamit sang face mask, social distancing, pabaskugon ang immune system pinaagi sa pagkaon sang masustansiya nga pagkaon kag pag-inum sang vitamin C.
