ROXAS CITY – Ginakabig ngahorrible event sang isa ka OFW sa Hong Kong ang natabo nga malapnagon nga hublag protesta kahapon kagabi, sa diin ginsulod sang mga rallyista ang Legislative Council building ukon government headquarters kag ginpangbuka ang bintana kag pirtahan kag ginwasak pa ang mga filing cabinets kag naggamit sang pepper spray sa mga paintings.
Sa interview sang Bombo Radyo kay Bombo International Correspondent Merlie Buño Protacio, ginpahayag sini nga sa sulod sang pito ka tuig nga pagtrabaho bilang domestic worker sa Hong Kong, ini pa lamang ang una nga bes nga natabo nga naglab-ot sa 2 ka milyon ang nagpasakup sa hublag protesta kag nangin bayolente ang iban nga mga protesters.
Aminado si Protacio nga apektado ang pila ka mga OFW’s nga nagaproseso sang ila nga mga pasaporte, bangud nahamtang ang Philippine Consulate sa government building sa diin ginapatigayon anghublag protesta.
Ginpanugyanan man sila nga likawan ang pagpadulong sa mga lugar sa diin ginapatigayon ang mga hublag protesta, agud indi sila mabutang sa maipit sa kinagamo.
Naintindihan man ni Protacio ang sentimyento sang Hong Kong people sa indi pagpabor sa ginaduso nga extradition bill, bangud nagapati sila nga indi patas ang laye sa China sa diin didto patigayunon ang trial sa indibidwal nga may ginapangatubang nga kaos.
Nahibaluan pa nga kadam-an sa mga nagpasakup ang mga estudyante nga ginhingalitan ang kahigayunan nga wala sila sang klase bangud Domingo nga adlaw.
