ROXAS CITY – Preparado na ang pila ka mga Pilipino nga yara sa pungsod Ukraine sa posible nga pag-atake sang Russia.
Sa interview sang Bombo Radyo Roxas kay Joy Fernandez OFW sa Ukraine ginpahayag sini nga preparado na ang ila nga mga gamit nga dalal-on kun sa tion nga atakihon ang nasambit nga pungsod.
Suno pa diri nga may yara sila sang grupo kun indi makaupod sa ila nga mga amo may yara sila sang lugar nga pagatipunan agud diri sila magakililita agud mag-evacuate sa hilway kag luwas nga lugar.
Ginsiling man sang amo ni Fernandez nga sa boundary sang Poland kag Romania sila maga-evacuate bangud ini nga lugar ang hilway kag malayo sa kinagamo.
Mahibaluan nga may yara sang kapin 200 ka mga OFW’s ang yara sa pungsod Ukraine.
Dugang pa sini nga ang ila nga tulog daw kaangay lamang sang manok bangud nagapamatyag sila sang tiyempo agud makapreparar. Sa karun, padayon sa gihapon sila nga nagapreparar sa posible matabo nga pagkinagamo ukon giyera.
