ROXAS CITY – Nagapangluya ang mga driver sang pampasahero nga salakyan sa probinsya sang Capiz, bangud sa asud-asod nga pagtaas sa presyo sang produktong petrolyo.
Sa interview sang Bombo Radyo kay Garry Barrera, jeepney driver nga may biyahe Jamindan – City kag vice versa, suno diri nga ang ila kita haloson makabawi sang ila gintughong nga krudo.
Dugangan pa sang ‘libre sakay’ nga programa sang gobyerno kag mga ka-kompetensiya nga mga pampasahero nga salakyan.
Wala man ang mga ini sang mahimo kun padayon nga nagatinaas ang presyo sang gatong, apang kuntani nga madumduman man ang ila sektor bangud may mga pamilya man sila nga ginabuhi sa ila pang adlaw-adlaw nga pamasada.
Suno naman kay Marianito Diaz, tricycle driver sa syudad sang Roxas, nga tuman gid kabudlay ang ila sitwasyon apang ginaantos nalang sini ang pagpamasahero, bangud wala man sang mahimo kun ini ang ginapatuman sang gobyerno.
Magluwas suno diri sa ka-kompetensiya nga ‘libre sakay,’ ‘coding’ kag manubo nga minimum sa pletehan, magadugang pa ang ila kalbaryo sa mahal sang gasolina kag mga balaklon.
Dugang pa sang duha ka mga drivers nga ila gid pasalamatan sang dako kun madumduman sang gobyerno ang ila sektor kag makahatag sang solusyon sa ila sitwasyon.
Nahibaluan nga ginsiling sang Department of Energy (DOE) nga ang rason sa pagtaas sang presyo sang gatong amu ang manipis nga supply kag mataas nga demand sa bug-os nga kalibutan.
