ILOILO CITY – Isa ka oil spill ang nareport sa baybayon sang Barangay Hoskyn sa banwa sang Jordan, Guimaras sang aga sang Sabado, Abril 25, nga nagresulta sa pagpahanumdom sa mga residente kag mangungisda nga likawan ang apektado nga coastal areas.
Suno sa report, nadiskubre ang oil-like substance las 7:05 a.m. malapit sa barangay hall kag covered court, kag nakaapekto sa pila ka parte sang Sitio Sambag kag Sitio Baluarte.
Nagdako ang kabalaka sang mga otoridad bangod sa posible nga epekto sini sa marine life, coastal resources, kag panglawas sang tawo.
Ang Barangay Hoskyn isa ka coastal community nga nagadepende gid sa pangisda, gani dako ang epekto sini sa pangabuhian sang mga residente.
Sa karon, nagakoordinar na ang mga lokal nga opisyal sa iban nga ahensya sang gobyerno para sa response kag monitoring, apang wala pa nahibaluan ang eksaktong ginhalinan sang oil spill.
